യൂണിഫോം

എയ്ഡഡ് സ്‌കൂളുകള്‍ ഉള്‍പ്പെടെ സംസ്ഥാനത്ത് 25 ലക്ഷത്തോളം വിദ്യാര്‍ത്ഥികള്‍ക്കും യൂണിഫോം നല്‍കുമെന്ന് വിദ്യാഭ്യാസമന്ത്രിയുടെ ഓഫീസ് അറിയിച്ചു. സംസ്ഥാനത്ത് സൗജന്യപാഠപുസ്തകം പോലെ ഇത്രയധികം പേര്‍ക്ക് സൗജന്യയൂണിഫോമും ലഭ്യമാവുന്നത് ആദ്യമായാണ്. ഗവ. സ്‌കൂളുകളിലെ 1 മുതല്‍ 8 വരെ ക്ലാസ്സുകളില്‍ പഠിക്കുന്ന, സാമ്പത്തികമായി പിന്നോക്കം നില്‍ക്കുന്ന ദാരിദ്ര്യരേഖയ്ക്കു താഴെയുള്ള ആണ്‍കുട്ടികളൊഴികെയുള്ള, എല്ലാ വിദ്യാര്‍ത്ഥികള്‍ക്കും രണ്ട് ജോടി യൂണിഫോമിന് തയ്യല്‍ക്കൂലിയടക്കം 400 രൂപയാണ് അനുവദിച്ചിരുന്നത്. ഗവ. മേഖലയില്‍ പഠിക്കുന്ന കുട്ടികള്‍ക്ക് നല്‍കുന്ന ആനുകൂല്യം എയ്ഡഡ് മേഖലയ്ക്ക് നിഷേധിക്കുന്നത് സാമൂഹ്യനീതിക്ക് നിരക്കാത്തതാണെന്ന നിലയ്ക്കാണ് എയ്ഡഡ് മേഖലയിലെ വിദ്യാര്‍ത്ഥികള്‍ക്കുകൂടി ഈ അദ്ധ്യയന വര്‍ഷം മുതല്‍ ഈ ആനുകൂല്യം അനുവദിക്കാന്‍ സര്‍ക്കാര്‍ തീരുമാനിച്ചത്. സംസ്ഥാന സര്‍ക്കാര്‍ 80 കോടി രൂപയാണ് ഇതിനായി നല്‍കുന്നത്. കേന്ദ്രവിഹിതം 33 കോടി അനുവദിച്ചിട്ടുണ്ട്.